.. شراقي العمر… بقلمي معوض حلمي الفلاح الفصيح.. جمهورية مصر العربية
م البدايه
نظره منك كات منايا
نسمه بتعـطر هـوايا
م البدايه
وانت قلبك لسه هاوي
وانت عاشـق للغناوي
كنت طبطب ع المشاعر
كنت هدي الحس حبه
كنت عبي القلب رقه
وابتديها دقه دقه
كان هايتعدل مسارك
وانكسارك وقت ندمك
يبــقى هــين
تلقى ولفـك قلـبه لين
يلمحك يعرف ظروفك
من ملامحك لما تفرح
واضطرابك وقت خوفك
م المعاني اللي ف حروفك
بين سطورك يفهمك
وانت سارح ف السكات
هايحس بيـك
وانت تايه ف الشـتات
هيــــلاقيك ويـــناديك
وهيسألك عن حب مات
حب كان مبدور أغاني
وحلم هاني وأمنيات
سيبته ليه ف الريح يعاني
وجاي تاني تقول سماح
دا اللي راح بيسيب آهات
واللي فات بيموت ماضيه
وخدت إيه ..؟
خدت إيه م الغربه قولي
لسه جاي طمعان ف فلي
وضلي رافض خط سيرك
آآآآه ياويلك
بعد قلبي مين سميرك
أنا كنـت طــــــــيرك
باعزف الالحان ف ليلك
بامسح الأحزان واجيلك
وابني من أشواقي دار
واحنا لسه الريش خضار
إشـــتريتك ، إشـتريتك
وارتضيتك تبقى عشي
كنت طاقة نور لوشي
وانت بايع باقتــــدار
بإختصار قصتنا عايزه
تدي صـبري الصـولجان
وتدي ليك ف الغدر جايزه
جايزه يمكن تبقى رادع
تعـترف إنك مخــــادع
وانت راجــع بالمـواجع
وقـبل ماتـــدق البيــبان
أنا كنت فارد حلمي مرسى
بعد توهتك تيجي ترسى
وانت برضه تزيد قساوتك
ياغــباوتك ، ياغـــباوتك
دا القـريب م العــــيون
ف الحشا بدر الخشوع
قـاد الشــــــموع
واللي خلى الهجر واحه
وساب جراحه مستباحه
ساب مساحه للدموع
فاوعـى تترجى القلـوب
أو تنزل دمعــتين
إوعى تشكي عمر فات
وعدى جري ف ثانيتين
كنت طبطب ع المشاعر
كنت هدي الحس حبه
كنت عبـي القلب رقه
وابتـديها دقـــه دقه
لمسة الأشواق تكفي
همسة العشـاق تدفي
كنت وفي الوعد واكسر
رعشة الخوف الحزين
قبل جرح الروح مايكبر
كنــت فكـر حبتـــين
كان شراقي العمر خضر
لو تبـــــــــدر بالحنــين
………………………………………
بقلمي معوض حلمي الفلاح الفصيح
منشأة بطاش تمي الأمـديد دقهلية
