العِشرة مش ضمان دي اختبار
بقلم الكاتبة / زينب مدكور عبد العزيز
في لحظة معيّنة في حياتنا، بنكتشف إن كل اللي كنا فاكرينه ثابت… مش ثابت. وإن الناس اللي كنا شايلينهم في قلوبنا ومصدقين إن بينهم وبينّا جسر من عشرة العمر، ما كانوش غير عابري سبيل. يمكن كانوا موجودين، لكن وجودهم ماكانش امتداد لروحنا… كان مجرد عادة..
سنين بنعدّها، ضحكات بنشاركها، مواقف بنفتكرها ونقول: “دول أهلي قبل ما يكونوا أصحابي”. نمشي معاهم الطريق ونحط في ضهرهم الأمان، ونخليهم ضهر لينا، ونصدق إن اليوم اللي هنقع فيه هيكونوا أول حد يمدّ إيده. لكن الحقيقة مؤلمة لما تتكشف: مش كل اللي عشنا معاهم عمر… عاشوا جوانا بجد.
أنا قابلت ناس عاشرتهم سنين حقيقي، مش عشرة يوم ولا يومين. عرفت تفاصيلهم، شفت ضعفهم، وشالوا ضعفي يوم من الأيام. ناس كانوا جزء من يومي، من كلامي، من فرحي وزعلي. كنت فاكرة إن اللي بينّا أكبر من الظروف، وأقوى من المسافات. كنت فاكرة إن المعروف بيتركن في القلوب، وإن الزمن بيقوّي الروابط… مش يكسرها.
لكن لما الظروف لفت، لما الحياة هزّتني، لما اتغيرت طريقتي في الوجود، لما احتجتهم… اكتشفت حاجة صادمة: الوشوش بتقع بسرعة. أسرع مما كنت أتصور.
عرفت وقتها إن العِشرة مش بالسنين.
ولا بالمواقف اللي احنا بس اللي افتكرناها.
ولا بمعروف قدمناه وبنقول يمكن ييجي يوم ويترد.
العِشرة الحقيقية مش زمن… العِشرة معدن.
مش كم سنة… لكن كم مرة حد وقف جنبك من غير ما تطلبي.
مش قدّ إيه ضحكنا مع بعض… لكن قدّ إيه وقفوا لما الدموع نزلت.
مش الناس اللي بتبان وقت الفرح… لكن اللي ما بيهربوش وقت الحزن.
السنين عمرها ما كانت دليل محبة. ساعات ناس نعرفهم من أسبوع يوقفوا في مكان ما وقفوش ناس عرفناهم من عشر سنين. وساعات كلمة صادقة من غريب تهوّن وجع… أكتر من عشرات الكلمات اللي مافيهاش روح.
أنا عرفت حقيقة مهمة متأخرة شوية… بس مهمة:
في ناس وجودهم في حياتك صدفة.
وفي ناس وجودهم نعمة.
وفي ناس وجودهم كان درس… درس علشان نعرف نفرّق.
نفرّق بين اللي يحبك بجد… واللي يحب راحتك.
بين اللي يفرحلك… واللي يفرح إنك محتاج له.
بين اللي يشيلك… واللي يشيل عنك.
بين اللي يسندك… واللي يستنزفك.
اتعلمت إن العلاقات ما تتقاسش بطولها… تتقاس بصدقها. وإن مش كل حد أقربلك أكتر هو الأوفى. ومش كل حد بعيد… هو الأقل قيمة. وإن اللي يبعد أول ماتهزّي الدنيا حواليكي… ده مش حد خسرته. ده حد ربنا شالك منه.
اتعلمت إن الظروف مش اللي بتغيّر الناس… الظروف هي اللي بتكشفهم.
بتكشف مين كان بيحبّك… ومين كان بيحب وجوده في حياتك.
بتكشف مين كان بيمثّل… ومين كان صادق من أول لحظة.
وفي النهاية…
أنا مبسوطة إني عرفت.
يمكن الوجع كان كبير، لكن الحقيقة كانت أهم.
لأن من بعدها… بقيت أختار بعقلي وقلبى معًا.
مابقتش أدي قيمة لسنين ما أثبتتش نفسها.
ولا أتمسك بعِشرة ما كانتش عِشرة.
بقيت أدي قلبي للّي يستاهل… مش للّي اتعود يكون موجود.
والنهارده…
أقدر أقول وأنا مرتاحة:
ما خسرتش حد… اللي حصل إني كسبت نفسي.
وكسبت إن قلبي بقى أنضج…
وعيني بقت تشوف أوضح…
وروحي بقت أصفى من ناس كتير…
كانوا مجرد ظل، واختفوا وقت الشمس.
ولو العِشرة عمرها ما كانت بالسنين…
فالحب عمره ما كان بالكلام.
الحب فعل. والحقيقة فعل.
واللي يثبت وقت الشدة… هو الوحيد اللي يستمر وقت الراحة.
