.. مقسومه روحي … بقلم / معوض حلمي الفلاح الفصيح.. جمهورية مصر العربية
عبـله اللي سـهر رمشـها عنتر
كات زي نور الشمس لما تقيد
طب ليه حبيبتي لغيري تتعطر
وانا لسه شـايل همـها عناقيد
ولا مره رمش عينيها قالي كلام
وبرغم ذلك لسه عزمي حديد
باحرس بيبانها لما تيجي تنام
وازرع غيطانها الحب والتوحيد
الفــرقـة بيـني وبيـنها نواحـه
والعـند باني ألف حيطه وسـد
الآهـه جـوا ف روحـنا دباحــه
والصـبر نز دموع تشـق الخـد
واقيد مشاعري الهايجه حواليها
عشـان عينيها الحـــــلوه تدفى
وتشوف حنـاني إيدين بترقيها
وتمــد إيـدها وتعــــدل الكـفه
والصبح ننده ع السواقي تدور
تروي العيـدان الشايله امانيـنا
بين الغيطان الخضره زي الحور
وطيـور بتدبي تغـني حـوالينا
ونسمه دايره تطفي ف الاشواق
غناوينا تحـلى وتبـقى حـدوته
يقولوا عني وعنها دول عشاق
والنخله تهــــدي الضله للتـوته
منحوته دمعة عيني ع الخدين
مقسومه روحي ف حبها نصين
وحبيبتي قاسيه وقلبها لم رق
وان قلبي دق بتسكته بسهمين
لو يوم تنادي هاجري واتمـايل
والقلب جـوا ضـلوعي يتمختر
بالليل معـاها هابقـى واد هايل
والنجـمه تنــده للقــمر يســـهر
ــــــــــــــــــــــــــــــــــــــــــــــــــــــ
بقلم معوض حلمي الفلاح الفصيح
منشأة بطاش تمي الأمديد دقهلـية
