/ طيروا تاني الحمام /اشرف الشناوي. جمهورية مصر العربية
رجعولنا
الضحكه تاني
وافتحوا الباب للأماني
ياللي خاطفين الابتسام
سيبوا بس قلوبنا تفرح
حتى لو من غير كلام
روحنا تعبت م الالام
طيروا تاني الحمام
رجعولنا الشمس ترسم
كفها يدفي الحيطان
رجعوا الليل بالأغاني
رجعوا الحلم اللي كان
طيروا تاني الحمام
رجعوا الصبح اللي تايه
يبدر النور في الغيطان
يزرع الأرض اللي ملت
م البكا ساعة الادان
رجعولنا الضحكه تاني
طيروا كل الحمام
……….. **** ………
اشرف الشناوي
شاعر عاميه
البرامون
المنصوره
